Suohkana namma lea boahtán Leaŋgáviikka báikkis (nr 36), mii gaskaáiggi rájes ja gitta 1879 rádjái lei suohkana vuoiŋŋalaš guovddáš. Go ovdagoddeláhka ásahuvvui 1837, de čuovui suohkanjuohku girku juogu. Leaŋgáviika lei dalle guhká jo leamaš sierra báhppasuohkan, 1759 rájes, ja namma sirdojuvvui de suohkanii.
Gieldda viidodat lea sullii 890 km2. Badjel bealli das lea Sáččá nuortta- ja davvenuorttaoasis, loahpat fas nannámis. Gielddas leat badjelaš 11.000 ássi.
Leaŋgáviikka suohkana vearjogovas leat golbma áirru. Dat govvida ahte mearra čanai iešguđet báikkiid olbmuid ovtta ollislašvuohtan.
Finnsnes suohkanguovddáš oaččui gávpotstáhtusa duhátjagimolsašumis. Hurtigruta bisána doppe juohke beaivve davás ja máttás manadettiinis. Dainna beasat Romsii ja Harstadii badjelaš diimmus. Finnsnes lea johtolatguovddáš, ja dat lea Cominor-bussefitnodaga váldobáiki. Senja Rutebil fas sáhtosta du buot Sáččá osiide. Ii leat guhkki maid hurgalit Beardogoržži girdišilljui, gos jo beasat riikka buot osiide.
Suohkan lea riikka buoremusaid searvvis mánáidgárdesajiid fállama dáfus, ja mis lea bures huksejuvvon, lávdaduvvon vuođđoskuvla. Prošeakta "Barnebyen Finnsnes" lea álggahuvvon, ja dainna áigut ovddidit gávpoga nu ahte dat vel buorebut geasuha bearrašiid, main leat smávva mánát. Golbma joatkkaskuvlla ja oahppoguovddáža addet dutnje vejolašvuođa ássat Leaŋgáviikkas ja váldit allaskuvladási joatkkaoahpa.
Leaŋgáviikka suohkanis lea máŋggabealat valáštallanbiras, máŋga valáštallanhálla, čierastallanluohkká ja čuovgaláhtut. Midt-Tromshallen, mas lea koanstarássešillju, lea guovllu oktasaš spábbačiekčangárdin, ja doppe lágiduvvojit maiddái ollu eará iešguđetlágan doaimmat. Maiddái Finnsnes stadionas ja Sáččá stadionas Islandsbotnis leat koanstarássešiljut, ja leat maid ollu spáppastallangiettit.
Finnsnesa kulturviessu lea guovllu kultuvrralaš váldogárdin. Maiddái Leaŋgáviikka álbmotgirjerádju lea kulturviesus. Eaktodáhtolaš kultureallin, masa gullet sullii 200 searvvi, jođihit feara makkár doaimmaid. Dasa lassin lágidit Finnsnesas máŋga festivála; Dálveriepmovahku Arctic Weekend, Arvid Hanssen-festivála, ja vel diehttelasat Finnsnes i Fest. Leaŋgáviikka museas Bjorelvnesas gánneha maid fitnat.
Leaŋgáviika ja Gaska-Romsa leat ovdánan positiivvalaččat, ja dan gávppašan- ja ealáhusovdáneapmi lea leamaš Romssa fylkka buoremus, go mihtida ássiidlogu ektui. Suohkan láhčá dilálašvuođaid ođđa fidnuid álggaheapmái gieldda industriijaguovlluin, earret eará Finnfjord hámmán- ja ealáhusguovllus.
Gávppašan- ja bálvalanealáhusas leat ollu buorit bargosajit, ja Finnsnes gávppašanguovddážiinnis geasuha sihke fitnodagaid ja olbmuid. Leaŋgáviikkas leat gal maid stuorra industriijafitnodagat, main barget guollešaddademiin, guolástanrusttegiiguin ja šolgadahttinrusttegiiguin. Maiddái guolástus ja eanandoallu leat ain mávssolaš ealáhusat.
Leaŋgáviikka suohkanii gullá maid oassi Norgga stuorámus sullos, Sáččás. Dan gohčodit maid ”Máinnassuolun”, ja lea dego Norgga miniatuvra, go doppe leat várit ja vuonat, bivdosajit ja vuotnagilážat, luondu, kultuvra ja olbmot, olmmošaddjáivuohta ja mokta, ja dálki – buot lágan.
Bures boahtin Leaŋgáviikii!
Oktavuođadieđut:
Leaŋgáviikka suohkan
9306 Finnsnes
Galledančujuhus: Rådhusveien 8, 9300 Finnsnes
Telefovdna: 77 87 10 00
Fáksa: 77 87 10 11
E-poasta: postmottak@lenvik.kommune.no
Ruovttusiidu: www.lenvik.kommune.no